Showing posts with label ഉത്തരദേശത്തെ കാണാകാഴ്ചകള്‍. Show all posts
Showing posts with label ഉത്തരദേശത്തെ കാണാകാഴ്ചകള്‍. Show all posts

Monday, February 4, 2013

ബേഡഡുക്ക: വൈവിധ്യങ്ങളുടെ മലയോര ഗ്രാമം

    1:47:00 AM   16 comments
ഉത്തരദേശത്തെ കാണാകാഴ്‌ചകള്‍-22


കാസര്‍കോട്ടെ കിഴക്കന്‍ മലയോര പഞ്ചായത്തുകളിലൊന്നാണ്‌ ബേഡഡുക്ക. 1961ലാണ്‌ ബേഡഡുക്ക പഞ്ചായത്ത്‌ രൂപീകൃതമായത്‌. കൊളത്തൂര്‍, മുന്നാട്‌, കു
ണ്ടംകുഴി, ബേഡഡുക്ക തുടങ്ങിയവയാണ്‌ ഈ പഞ്ചായത്തിലെ പ്രധാന ഗ്രാമങ്ങള്‍. സാമൂഹ്യ-സാംസ്‌കാരിക-രാഷ്‌ട്രീയ-കാര്‍ഷിക-കായിക രംഗങ്ങളില്‍ ഈ ഗ്രാമങ്ങള്‍ക്ക്‌ പറയാനുള്ള ചരിത്രവും, നേട്ടവും ഏറെയാണ്‌.
ജാതി-മത-ഭാഷാ വൈവിധ്യങ്ങളാണ്‌ ഈ ഗ്രാമത്തിന്റെ ഏറ്റവും വലിയ പ്രത്യേകത. ഹി
ന്ദു, മുസ്ലിം മതവിഭാഗങ്ങള്‍ക്ക്‌ പുറമെ ക്രിസ്‌തു മതത്തിനും ഇവിടങ്ങളില്‍ നല്ലവേരോട്ടമുണ്ട്. ജാതി വ്യവസ്ഥ നിലനിര്‍ത്തുകയും അവ പാലിക്കപ്പെടുകയും അതിനനുസരിച്ച്‌ ജീവിതക്രമം ചിട്ടപ്പെടുത്തുകയും ചെയ്‌തിരുന്ന വലിയൊരു ജന വിഭാഗം ഇവിടെയുണ്ടായിരുന്നു. അവര്‍ വ്യത്യസ്‌ത വിഭാഗങ്ങളായി കഴിയുകയും വിഭിന്നങ്ങളായ ജോലിയില്‍ ഏര്‍പ്പെട്ട്‌ ജീവിതമാര്‍ഗം കണ്ടത്തുത്തുകയും ചെയ്‌തിരുന്നു.
പാരമ്പര്യ ചെത്തുതൊഴില്‍ ചെയ്‌തുപോന്നിരുന്നവരായിരുന്നു ഇവിടത്തെ തീയ്യ സമുദായം. ശാല്യര്‍ വിഭാഗക്കാര്‍ തുണി നെയ്‌ത്തും മണിയാണി (യാദവ) വിഭാഗം കല്‍പ്പണിയും ചെയ്‌താണ്‌ ജീവിച്ചുപോന്നത്‌. തേങ്ങയാട്ടി എണ്ണയെടുക്കുന്ന ജോലിയായിരുന്നു വാണിയ സമുദായത്തിന്റേത്‌. വണ്ണാത്തന്മാര്‍ അലക്കുജോലി ചെയ്‌തും മലയരും കോപ്പാളരും തെയ്യംകെട്ടിയും ജീവിതമാര്‍ഗം 
കണ്ടത്തി. കാര്‍ഷിക അഭിവൃദ്ധിയുടെ ചിഹ്നമായ തലപ്പാള നിര്‍മ്മാണവും കോപ്പാള വിഭാഗത്തിന്റെ കൈത്തൊഴിലായിരുന്നു. ജന്മിമാരുടെ കീഴില്‍ കാര്‍ഷിക വൃത്തിയിലേര്‍പ്പെട്ടവരായിരുന്നു മാവിലര്‍. വിശ്വകര്‍മ്മജര്‍ മരപ്പണിയുംഇരുമ്പു പണിയും ചെയ്‌തുപോന്നു . കര്‍ണാടകയില്‍ വേരുള്ള നായിക്കന്മാരും കാര്‍ഷിക വൃത്തിയില്‍ ഏര്‍പ്പെട്ടവരായിരുന്നു. ക്ഷൗരപ്പണി ചെയ്‌തിരുന്നവരായിരുന്നു ബണ്ഡാരിമാര്‍.  മാരാര്‍, വാര്യര്‍ സമുദായങ്ങള്‍ ക്ഷേത്രപ്പണി ചെയ്‌തുപോന്നവരായിരുന്നു. കര്‍ണാകയില്‍ നിന്ന്‌ കുടിയേറിയ കര്‍ഷക ജന്മിവിഭാഗമായിരുന്നു ഗൗഡന്മാര്‍. ഇവിടത്തെ ന്യൂനപക്ഷ വിഭാഗമായിരുന്നു ബ്രാഹ്‌മണന്മാര്‍. കൃഷി, ക്ഷേത്രപൂജ 
എന്നിവയായിരുന്നു ഇവരുടെപ്രധാന ജോലി. ബ്രാഹ്‌മണര്‍ മൂന്നുവിഭാഗങ്ങളായിരുന്നു. തുളു സംസാരിക്കുന്നവര്‍ തുളു ബ്രാഹ്‌മണരെന്നും കര്‍ണാടകയില്‍ വേരുള്ളവര്‍ ഹവ്യയ്‌ക്ക്‌ ബ്രാഹ്‌മണരെന്നും മഹാരാഷ്‌ട്രയുമായി ബന്ധമുള്ളവര്‍ കരകിഠാ ബ്രാഹ്‌മണരെന്നും അറിയപ്പട്ടു.



മലയാളം, കന്നട, ഉറുദു, തുളു, മറാഠി, ഹിന്ദുസ്ഥാനി ഭാഷകള്‍ ഈ ഭാഗങ്ങളില്‍ വ്യാപകമായി ഉപയോഗിക്കുന്നുണ്ട്.  ഓരോ വിഭാഗത്തില്‍പെട്ടവരും വെവ്വേറെ ഭാഷകളാണ്‌ ഉപയോഗിക്കുന്നത്‌ എന്നത്‌ശ്രദ്ധേയമാണ്‌. മലയന്‍, വണ്ണാന്‍ സമുദായത്തില്‍പെട്ടവരാണ്‌ മലയാളം ഉപയോഗിച്ചുപോരുന്നത്‌. കോപ്പാളന്‍, മാവിലന്‍ സമുദായക്കാര്‍ തുളുഭാഷയും ബ്രാഹ്‌മണര്‍ മറാഠി ഭാഷയും നായന്മാര്‍ കന്നടയും അവരുടേതായ ഭാഷയായി പ്രയോഗിക്കുന്നു. മലയാളത്തിന്റെ പ്രയോഗത്തില്‍ കന്നടയുടെ സ്വാധീനംഇവിടെ പ്രബലമാണ്‌. വിഭിന്നമായ നാട്ടുഭാഷകളും പ്രയോഗങ്ങളും ഈഭാഗത്ത്‌ പ്രചാരത്തിലുണ്ട്. ഇവിടത്തെ നാട്ടു ഭാഷയ്‌ക്ക്‌ ഗൗരവമായ ഗവേഷണ സാധ്യതയു്‌ണ്ട്.
 
ഹൈദരാലിയുടെയും ടിപ്പുവിന്റെയും പടയോട്ട കാലങ്ങളില്‍ കടന്നുവന്ന തുര്‍ക്കന്മാരാണത്രെ ഇവിടെ ഇസ്ലാമി
ക സംസ്‌കാരത്തിന്‌ തുടക്കംകുറിച്ചത്‌. ആ സ്‌മരണ വിളിച്ചോതുന്നതരത്തില്‍ തുര്‍ക്കന്മാര്‍ എന്ന അറിയപ്പെടുന്ന  മുസ്ലിംകള്‍ ഇവിടെ പല ഭാഗത്തായി ഇന്നും താമസിച്ചുവരുന്നുണ്ട്. 


കുണ്ടംകുഴിയില്‍ ഇക്കേരി നായക്കന്മാരുടെ കാലത്ത്‌നിര്‍മ്മിച്ച കോട്ടയുണ്ടായിരുന്നു. കുംണ്ടംകുഴി ക്ഷേത്രത്തിന്റെ ചുറ്റിലായാണ്‌ ഈ കോട്ട നിലനിന്നിരുന്നത്‌. ഇപ്പോഴതിന്റെ ചില ഭാഗങ്ങള്‍ മാത്രമേ അവിടെ അവശേഷിക്കുന്നുള്ളൂ. ഈ പ്രദേശത്തിന്റെ  ചരിത്രം ചൂണ്ടിക്കാണിക്കുന്ന സ്‌മാരകമാണിത്‌.


കുംണ്ടം കുഴി ഗവ: ഹയര്‍സെക്കണ്ടറി സ്‌കൂളാണ്‌ ഈ ഗ്രാമത്തിലെ പ്രധാന വിദ്യാഭ്യാസസ്ഥാപനം. 1955ല്‍ ഒരു സ്വകാര്യ വ്യക്തിയുടെ പത്തായപ്പുരയിലായിരുന്നു ഈസ്‌കൂളിന്റെ പിറവി. 1961ല്‍ ഒരുതാല്‍ക്കാലിക ഓലപ്പുരയിലേക്ക്‌ മാറി. പിന്നീട്‌ ഈ വിദ്യാകേന്ദ്രം  വളരുന്നതിനൊപ്പം പ്രദേശത്തിന്റെ വിജ്ഞാനദാഹത്തിന്‌ കൂടി ശമനമാവുകയായിരുന്നു. 1963ല്‍ സ്വന്തം കെട്ടിടത്തിലേക്ക്‌മാറി. 1976ല്‍ ഹൈസ്‌കൂളായും 1997ല്‍ ഹയര്‍സെക്കറിയായും ഉയര്‍ത്തിയ ഈ സ്‌കൂള്‍ ജില്ലയിലെ പ്രധാന സ്‌കൂളുകളിലൊന്നാണ്‌.

കൊളത്തൂര്‍ ഗവ: സ്‌കൂള്‍, ബേഡഡുക്ക ഗവ: സ്‌കൂള്‍, മുന്നാട്‌ ഗവ: ഹൈസ്‌കൂള്‍ തുടങ്ങിയവയാണ്‌ മറ്റു പ്രധാന വിദ്യാഭ്യാസ സ്ഥാപനങ്ങള്‍. മുന്നാട്‌ പീപ്പിള്‍സ്‌ആര്‍ട്‌സ്‌ ആന്റ ് സയന്‍സ്‌ കോളേജ്‌, ദീക്ഷണ സഹകരണ കോളേജ്‌ എന്നീ ഉന്നത വിദ്യാഭ്യാസ കേന്ദ്രങ്ങളും ഇവിടെ  പ്രവര്‍ത്തിച്ചുവരുന്നു.

കാര്‍ഷിക രംഗത്തും ഈ പ്രദേശങ്ങളുടെ ഉന്നതി എടുത്തുപറയേ
ണ്ടതു തന്നെയാണ്‌. ഈ പ്രദേശങ്ങളിലെ പ്രധാന സാമ്പത്തിക സ്രോതസ്സ്‌ തന്നെകാര്‍ഷിക മേഖലയാണ്‌. റബ്ബറാണ്‌ ഇവിടെ ഏറ്റവും കൂടുതല്‍ ഉല്‍പാദിപ്പിക്കുന്നത്‌. നാളികേരം, അടക്ക, കശുവണ്ടി തുടങ്ങിയ കാര്‍ഷിക വിഭവങ്ങളും ഇവിടെ നല്ല രീതിയില്‍ ഉല്‍പാദിപ്പിക്കുന്നു.

 കന്നട സംസ്‌കാരം ഉള്‍ക്കൊള്ളുന്നവരും തെക്കന്‍ കേരളത്തില്‍ നിന്ന്‌ കുടിയേറിയവരും ഇവിടത്തെ കാര്‍ഷിക സംസ്‌കാരത്തിന്‌ അവരുടേതായ കയ്യൊപ്പ്‌ ചാര്‍ത്തിയവരാണ്‌.

കായിക രംഗത്ത്‌ ഈ ഗ്രാമത്തിന്റെ സംഭാവന വിലപ്പെട്ടതാണ്‌. കബഡി, വോളിബോള്‍ എന്നിവയാണ്‌ ഇവിടത്തെ പ്രധാന വിനോദം. ഈമേഖലയില്‍ ഒരുപാട്‌ സംസ്ഥാന-ദേശീയ താരങ്ങളെ വളര്‍ത്തിയെടുക്കാന്‍ ഈ പ്രദേശത്തിനായിട്ടു
ണ്ട്. മറ്റു കലാ-കായിക രംഗങ്ങളിലും ഒട്ടേറെ നേട്ടങ്ങളുണ്ടാക്കാന്‍ ഈ ഗ്രാമത്തിനായിട്ടുണ്ട്. 

നാടക-സിനിമാ രംഗത്തും വ്യക്തിമുദ്ര പതിപ്പിച്ച ഒട്ടേറെ വ്യക്തികളെ സംഭാവന ചെയ്യാനും ഈ ഗ്രാമത്തിനു സാധിച്ചിട്ടുണ്ട്. 

ദക്ഷിണ കാശി എന്നറിയെപ്പടുന്ന കു
ണ്ടംകുഴി ശ്രീ പഞ്ചലിംഗേശ്വര ക്ഷേത്രം, പ്രസിദ്ധമായ മഖാമുള്ള മരുതടുക്കം മുസ്ലിം പള്ളി, പടുപ്പിലെയും വീട്ടിയാടിയിലെയും ക്രിസ്‌ത്യന്‍ പള്ളികള്‍ എന്നിവയാണ്‌ ഈ ഭാഗത്തെ വിവിധ മതസ്ഥരുടെ പ്രധാന ആരാധനാലയങ്ങള്‍.


സമുദ്ര നിരപ്പില്‍ നിന്ന്‌ 2000 അടിവരെ ഉയര്‍ന്നു നില്‍ക്കുന്ന മലകളാണ്‌ ഈ ഗ്രാമത്തിന്റെ മുഖ്യ ആകര്‍ഷണം. ഗ്രാമത്തിന്റെ അതിര്‍ത്തികളിലായി നിറെഞ്ഞാഴുകുന്ന എരിഞ്ഞിപ്പുഴയും കരിച്ചേരി പുഴയും അവയ്‌ക്ക്‌ മുകളിലൂടെ സഞ്ചാരമൊരുക്കുന്ന വാവടുക്കം താഞ്ഞേരി പാലങ്ങളും ഇവിടങ്ങള്‍ക്ക്‌ പ്രത്യേക സൗ
ന്ദര്യം നല്‍കുന്നു. ഒപ്പം മലകളെ പുതപ്പിക്കുന്ന ചെറുകാടുകളും നാട്ടിന്‍പ്രദേശങ്ങളിലാകെ പ്രകൃതിയുടെ പച്ച നിറംനല്‍കുന്ന കാര്‍ഷിക നിലങ്ങളും ഇവിടെ വേറിട്ട കാഴ്‌ചകളൊരുക്കുന്നു.





                                                 (Published in Uthradesham with Jabir Kunnil)

Monday, January 28, 2013

ബേക്കല്‍കോട്ട: കാസര്‍കോടിന്‌ മേല്‍വിലാസം നല്‍കിയ ചരിത്ര സ്‌മാരകം

    7:07:00 AM   13 comments
ഉത്തരദേശത്തെ കാണാകാഴ്‌ചകള്‍ -21

പോയകാലത്തെ സാമൂഹ്യ-സാംസ്‌കാരിക-ഭരണ ചരിത്രത്തിലേക്ക്‌ വിരല്‍  ചൂണ്ടുന്ന വെറും ഒരു സ്മാരകം മാത്രമല്ല ബേക്കല്‍ കോട്ട പുതിയ കാലത്തെ വിനോദസഞ്ചാരികള്‍ക്ക്‌ കണ്‍ കുളിര്‍ക്കെ കണ്ടാസ്വദിക്കാന്‍ 

പ്രകൃതിയുടെ മനോഹരമായ ഇടത്തില്‍ കെട്ടിപ്പൊക്കിയ മഹാ സൗധം
രാജ്യന്തര ശ്രദ്ധയാകര്‍ഷിച്ച പ്രമുഖ ടൂറിസ്റ്റ്‌ കേന്ദ്രമാണ്‌ ബേക്കല്‍കോട്ട. ലോക ടൂറിസം ഭൂപടത്തില്‍ കാസര്‍കോടിന്‌ മേല്‍വിലാസം നല്‍കുന്നതും ബേക്കല്‍കോട്ടയാണ്‌.
കേരളത്തില്‍ അവശേഷിച്ചിട്ടുള്ള കോട്ടകളില്‍ എല്ലാംകൊണ്ടും മുന്‍പന്തിയില്‍ നില്‍ക്കുന്ന ഈ കോട്ട ഏകദേശം
31 ഏക്കര്‍ വിസ്തൃതിയില്‍ വിശാലമായി വ്യാപിച്ചു കിടക്കുന്നു.  

 കാസര്‍കോട്‌-കാഞ്ഞങ്ങാട്‌ തീരദേശ മേഖലയില്‍ പള്ളിക്കര പഞ്ചായത്തിലാണ്‌ ബേക്കല്‍കോട്ട. കാസറഗോഡ് നഗരത്തില്‍ നിന്ന് 12 കിലോമീറ്ററും കാഞ്ഞങ്ങാട്ടു നിന്ന് 10 കിലോമീറ്ററും മാണ് ഇവിടെയ്ക്കുള്ള ദൂരം.

ആര്‍ത്തിരമ്പുന്ന അറബിക്കടലിന്റെ വശ്യമായസംഗീതവും തിരമാലകള്‍തീര്‍ക്കുന്ന നിലക്കാത്ത ആരവ
ങ്ങളും തലോടിയാണ്‌ ബേക്കല്‍കോട്ടയുടെ നില്‍പ്പ്‌.
1909ല്‍ തെക്കന്‍ കര്‍ണാടക ജില്ലാ കലക്‌ടറായിരുന്ന ഖാന്‍ ബഹദൂര്‍ അസീസുദ്ദീന്‍ നിര്‍മ്മിച്ച ടി.ബിയാണ്‌
കോട്ടക്കകത്തെ പ്രധാന ആകര്‍ഷണം. കോട്ടയുടെ എല്ലാ ഭാഗങ്ങളിലും കൊത്തളങ്ങളു്‌. ഒട്ടേറെ പടിക്കെട്ടു
കളോടുകൂടിയുള്ള വലിയകുളം, തെക്കുഭാഗത്തായി കടല്‍തീരത്തേക്ക്‌ വഴിയൊരുക്കുന്ന രഹസ്യകവാടം, വെടിമ
രുന്ന്‌ സൂക്ഷിക്കാന്‍ ഉപയോഗിച്ചിരുന്ന മരുന്നറ എന്നിവയും നൂറ്റാണ്ട്കള്‍ക്കപ്പുറത്തെകഥ പറഞ്ഞ്‌ ഇവിടെ അവശേഷിക്കുന്നു.

കടലില്‍ നിന്ന്‌ കെട്ടിപ്പൊക്കിയ കണക്കെ ഭൂരിഭാഗവും കടലിലേക്ക്‌ ഇറങ്ങി നില്‍ക്കുന്ന കോട്ടയുടെ പുറം മതിലിനെ നൂറ്റാണ്ടുകളായി തിരമാലകള്‍ തഴുകിക്കൊണ്ടിരിക്കുന്നു. കോട്ടയുടെ പ്രവേശനകവാടത്തോടു ചേര്‍ന്നുള്ള ഹനുമാന്‍
ക്ഷേത്രവും സമീപത്തായുള്ള മുസ്ലിം പള്ളിയും മതസൗഹാര്‍ദ്ദം വിളിച്ചോതി ഇന്നും നിലകൊള്ളുന്നു. വളഞ്ഞുപുള
ഞ്ഞായുള്ള കോട്ടയുടെ പ്രവേശന കവാടവും കോട്ടമതിലിന്‌ വെളിയില്‍ കാണുന്ന കിടങ്ങുകളും പ്രതിരോധം തീര്‍ക്കാനാണ്‌ നിര്‍മ്മിച്ചതെങ്കിലും ഇന്നത്‌ കാഴ്‌ചതേടിയെത്തുന്നവര്‍ക്ക്‌ കൗതുകമാണൊരുക്കുന്നത്‌.


മധ്യഭാഗത്ത്‌ ഉയര്‍ന്നു നില്‍ക്കുന്ന നിരീക്ഷണ ഗോപുരത്തിലേക്ക്‌ ചരിഞ്ഞുകയറി പ്പോകാനായുള്ള വീതിയുള്ള പാത ഏറെ ശ്രദ്ധയാകര്‍ഷിക്കുന്ന ഭാഗമാണ്‌. `പതാക ധ്വജ' എന്നാണ്‌ ഇത്‌ അറിയെപ്പടുന്നത്‌. ഇവിടെ നിന്ന്‌ നോക്കിയാല്‍ ബേക്കല്‍, പള്ളിക്കര, കോട്ടിക്കുളം, ഉദുമ, കാഞ്ഞങ്ങാട്‌ തുടങ്ങിയ പ്രദേശങ്ങള്‍ കാണാനാവും.

ഇതൊരു ഭരണസിരാ കേന്ദ്രമായിരുന്നുവെന്ന്‌ ഇവിടത്തെ കെട്ടിടാവശിഷ്‌ടങ്ങള്‍ തെളിയിക്കുന്നു. കോട്ടയുടെ ചുറ്റുമതിലില്‍ കാണുന്ന ദ്വാരങ്ങളുടെ ലകഷ്യ വ്യതിയാനങ്ങളുംശ്രദ്ധേയമാണ്‌. മുകളിലെ ദ്വാരം ഏറ്റവും ദൂരത്തേക്കും
തൊട്ടുതാഴെയുള്ള ദ്വാരം കോട്ടയുടെ തൊട്ടടുത്തേക്കും ലക്ഷ്യം വെച്ചുകൊണ്ടുള്ളതാണ്‌. നാടിന്റെ പ്രതിരോധ ആവശ്യങ്ങള്‍ക്കായിരുന്നു ഈ കോട്ട ഉപയോഗിച്ചതെന്ന്‌ ഇത്‌ തെളിയിക്കുന്നു.
അറബിക്കടലിലേക്ക്‌ ഇറങ്ങി നില്‍ക്കുന്ന നിരീക്ഷണ കേന്ദ്രം  കടല്‍ വഴിയുള്ള ആക്രമണത്തെ ചെറുക്കാനായി പണിതതാണെന്നാണ്‌ പറയപ്പെടുന്നത്‌.

ബേക്കല്‍ കോട്ടയുടെ ഐതിഹ്യവും ചരിത്രവുമൊക്കെ വിഭിന്നാഭിപ്രായങ്ങ ളായാണ്‌ രേഖപ്പെടുത്തിയിരിക്കുന്നത്‌. ഈ പ്രദേശം പെരുമാള്‍കാലഘട്ടത്തില്‍ മഹോദയപുരത്തിന്റെ ഭാഗമായിരുന്നു. പന്ത്രാം നൂറ്റാണ്ടോടെ പെരുമാള്‍ രാജവംശം ക്ഷയിച്ചതോടെ കോലത്തുനാടിന്റെ ഭാഗമായിത്തീര്‍ന്നു. ഇക്കാലത്ത്‌ തുളുനാട്ടിലെ പ്രബല തുറമുഖങ്ങളിലൊന്നായി ബേക്കല്‍വളര്‍ന്നു. 1565ല്‍ തളികോട്ട യുദ്ധത്തോടെ വിജയനഗര സമ്രാജ്യം തകര്‍ന്നു. തുടര്‍ന്ന്‌

ഹിരിയ വെങ്കടപ്പ്‌ നായക്കിന്റെ കാലത്ത്‌ (1583-1620)കോട്ട നിര്‍മ്മാണം ആരംഭിക്കുകയും ശിവപ്പ നായക്കിന്റെ ഭരണകാലത്ത്‌ (1625-1670) നിര്‍മ്മാണം പൂര്‍ത്തികരിക്കുകയും ചെയ്‌തു.

1763ല്‍ മൈസൂര്‍ രാജാവായ ഹൈദരാലിയുടെ പടയോട്ടത്തോടെ നായക്കന്മാരുടെ സ്വാധീനം അവസാനിക്കുകയും കോട്ട മൈസൂര്‍സുല്‍ത്താന്മാരുടെ കൈവശമാവുകയും ചെയ്‌തു. 1799ല്‍ നാലാം മൈസൂര്‍ യുദ്ധത്തില്‍ ടിപ്പു വീരമൃത്യുവരിച്ചതോടെ കോട്ടയുടെ നിയന്ത്രണം ഇംഗ്ലീഷ്‌ ഈസ്റ്റിന്ത്യാ കമ്പനിയുടെ കീഴിലായി. കമ്പനി ഭരണകാലത്ത്‌
ദക്ഷിണ കാനറാ ജില്ലയുടെഭാഗമായി കോട്ട ആസ്ഥാനമാക്കി ബേക്കല്‍ താലൂക്ക്‌രൂപീകരിച്ചു. 1862ല്‍ കാസര്‍കോട്‌ താലൂക്ക്‌ രൂപംകൊണ്ടതോടെ ബേക്കലിന്റെ രാഷ്‌ട്രീയ-സാമ്പത്തിക പ്രാധാന്യം മങ്ങിത്തുടങ്ങി.

സ്വാതന്ത്ര്യത്തിന്‌ ശേഷം കേന്ദ്ര സര്‍ക്കാറിന്റെ കീഴിലുള്ള പുരാവസ്‌തു ഗവേഷണ വിഭാഗത്തിന്റെ പരിരക്ഷയിലായി കോട്ടയുടെ പരി പൂര്‍ണ സംരക്ഷണം.

ഡോ: ഹെര്‍മണ്‍ഗുണ്ടര്‍ട്ടിന്റെ അഭിപ്രായത്തില്‍ ഡച്ചുകാരാണ്‌ ബേക്കല്‍ കോട്ട പണിതതെന്നാണ് രേഖപ്പെടുത്തിയിട്ടുള്ളത്‌. കോലത്തിരി ആധിപത്യത്തിന്റെ ആദ്യ കാലങ്ങളില്‍തന്നെ ബേക്കല്‍കോട്ട നിലവില്‍


വന്നിട്ടുണ്ടാവുമെന്നാണ്‌ കണ്ണൂര്‍ ജില്ലാ ഗസറ്റിയറില്‍(1972) എ. ശ്രീധരമേനോന്‍ അഭിപ്രായപ്പെട്ടിട്ടുള്ളത്‌. 18-ാം
നൂറ്റാണ്ടില്‍ രചിച്ച `കേളദിനൃപ വിജയം കാവ്യ'ത്തില്‍ കവി ലിങ്കണ്ണ പറയുന്നത്‌ ഇക്കേരി ശിവപ്പ നായക്ക്‌ 1645-60 കാലത്ത്‌ ബേക്കല്‍കോട്ട അക്രമിച്ച്‌ പിടിച്ചെടുത്തു എന്നാണ്‌.  യൂറോപ്യന്‍ ശൈലിയുടെ അടയാളങ്ങള്‍ ബേക്കല്‍കോ

ട്ടയില്‍ കാണപ്പെടുന്നുവെ ന്നാണ്‌ സ്റ്റുവര്‍ട്ട്‌ കാനറഡിസ്‌ട്രിക്‌ട്‌ രണ്ടാം വാള്യ ത്തില്‍ (1895) രേഖപ്പെടുത്തിയി
ട്ടുള്ളത്‌. ഇതേ അഭിപ്രായം തന്നെയാണ്‌ ഡോ: എം.ജി.എസ്‌. നാരായണന്റേതും.
പ്രമുഖ ചരിത്രകാരനായ ഡോ: കെ.കെ.എന്‍. കുറുപ്പിന്റെ അഭിപ്രായത്തില്‍ തികച്ചും ഭാരതീയ ശൈലിയാണ്‌ കോട്ടയില്‍ കാണുന്ന തെന്നാണ്‌. ഒപ്പം പോര്‍ച്ചുഗീസ്‌ സ്വാധീനവും അദ്ദേഹം സൂചിപ്പിക്കുന്നു.
കോലത്തിരി രാജവംശത്തിലെ തലമുതിര്‍ന്ന അംഗം കോലത്തിരി രാജാവായും കര കോട്ടയുടെയും മൂന്നാമെത്തയാള്‍ വെക്കൊളത്ത്‌ കോട്ടയുടെയും ചുമതല വഹിച്ചിരുന്നുവെന്നും ഈ വെക്കോളത്ത്‌ കോട്ടയാണ്‌ ബേക്കല്‍ കോട്ടയായ 
തെന്നുമാണ്‌ പലരും കരുതുന്നതെന്ന്‌ കേരള ചരിത്രത്തില്‍ കെ.പി. പത്മനാഭ മേനോന്‍ ചൂണ്ടിക്കാട്ടുന്നു.



1992ല്‍ കേന്ദ്ര സര്‍ക്കാര്‍ ബേക്കല്‍കോട്ടയെ പ്രത്യേക ടൂറിസം മേഖലയായി പ്രഖ്യാപിച്ചു. 1992ഓടെ ബേക്കല്‍

ടൂറിസം ഡവലപ്‌മെന്റ കോര്‍പറേഷന്‍ രൂപീകരിച്ച്‌ അന്താരാഷ്‌ട്ര നിലവാരമുള്ള ടൂറിസം മേഖലയായുയര്‍ത്താനുള്ള നടപടികള്‍ ആരംഭിച്ചു. പിന്നീട്‌ രാജ്യത്തെ മുന്‍നിര
ടൂറിസ്റ്റ്‌ കേന്ദ്രങ്ങളിലൊന്നായി ബേക്കല്‍കോട്ട വളരുകയായിരുന്നു. ചരിത്ര സ്‌മാരകങ്ങളും പ്രകൃതി ഭംഗിയും മത്സരിച്ചൊരുക്കുന്ന മനോഹര കാഴ്‌ചകള്‍തേടി ബേക്കല്‍ കോട്ടയില്‍ വിദേശികളടക്കം ദിനേനയെത്തുന്നത്‌ ഏറെപേ
രാണ്‌. പ്രശസ്‌ത സംവിധായകന്‍ മണിരത്‌നത്തിന്റെ `ബോംബെ' എന്ന സിനിമയിലെ `ഉയിരെ' എന്ന സൂപ്പര്‍ഹിറ്റ്‌ ഗാനത്തിന്റെ ചിത്രീകരണം നടന്നത്‌ ഇവിടെ വെച്ചാണ്‌. മറ്റു ഒട്ടേറെ ചിത്രങ്ങള്‍ക്കും മ്യൂസിക്ക്‌ ആല്‍ബങ്ങള്‍ക്കും പരസ്യ
ചിത്രങ്ങള്‍ക്കും ബേക്കല്‍കോട്ട പശ്ചാത്തലമൊരുക്കിയിട്ടു്‌.
സംസ്ഥാന സര്‍ക്കാറിന്റെ കീഴില്‍ രൂപംക്കൊടുത്ത ബേക്കല്‍ റിസോര്‍ട്ട്‌ ഡവലപ്‌മെന്റ്‌ കോര്‍പറേഷന്‍ (ബി.ആര്‍.ഡി.സി.) പദ്ധതിയിലൂടെ കൂടുതല്‍ പുരോഗമിക്കുകയാണ്‌ ബേക്കല്‍കോട്ടയും സമീപ ഗ്രാമങ്ങളും. ഇതുകാരണം ഒട്ടേറെ അന്താരാഷ്‌ട്രഹോട്ടല്‍, റിസോര്‍ട്ട്‌ ശൃംഖലകളും, അനുബന്ധ ടൂറിസ്റ്റ്‌ കേന്ദ്രങ്ങളും വര്‍ണക്കാഴ്‌ചകളൊരുക്കി സഞാരികളെയും കാത്തിരിക്കുന്നു..    
(Published in Uthardesham with Jabir Kunnil)





Saturday, January 26, 2013

കാറഡുക്ക: ഉത്തരകേരളത്തിന്റെ ഇടനാട്‌

    2:56:00 AM   9 comments
ഉത്തരദേശത്തെ കാണാകാഴ്‌ചകള്‍ -20


കര്‍ണാടകയുമായി അതിര്‍ത്തി പങ്കിടുന്ന കാസര്‍കോട്ടെ കിഴക്കന്‍ പഞ്ചായത്തുകളിലൊന്നാണ്‌ കാറഡുക്ക. കിഴക്കുനിന്ന്‌ പടിഞ്ഞാറോട്ട്‌ ചരിഞ്ഞാണ്‌ കാറഡുക്ക ഗ്രാമം സ്ഥിതി ചെയ്യുന്നത്‌. പയസ്വിനി പുഴയുടെ താരാട്ട്‌ കേട്ട്‌ വിശ്രമിക്കുന്ന കുന്നുകളും, താഴ്‌വാരങ്ങളും ഈ ഗ്രാമത്തിന്‌ വേറിട്ട കാഴ്‌ചകളൊരുക്കുന്നു. ചില പ്രദേശങ്ങളെ ചുറ്റി കിടക്കുന്ന  റിസര്‍വ്‌ വനവും  ഈ ഗ്രാമത്തിന്‌ പ്രതേക ആഡ്യത്തം  നല്‍കുന്നു.

കുന്നുകളും താഴ്‌വരകളും, കൃഷി യോഗ്യമായ സ്ഥലങ്ങളും   നിറഞ്ഞതിനാലാവണം ഉത്തര കേരളത്തിന്റെ ഇടനാട്‌ എന്ന പ്രയോഗം ഈ പ്രദേശത്തിന്‌ തികച്ചും യോജിക്കുന്നു. ആദൂര്‍, കാടകം എന്നീ ഗ്രാമങ്ങള്‍ ചേര്‍ത്ത്‌ രൂപീകരിച്ചതാണ്‌ കാറഡുക്ക പഞ്ചായത്ത്‌. കാടിന്റെ അടുത്തുള്ളപ്രദേശം എന്ന അര്‍ത്ഥത്തിലാണ്‌ കാടകം എന്ന പേരുണ്ടായതെന്ന്‌ പറയു
ന്നു. പിന്നീട്‌ കര്‍ണാടകയുടെ സ്വാധീനം കൊണ്ടാണ്  അത്‌ കാറഡുക്കയായതത്രെ.
അതുപോലെ അധു ഊര്‌ അഥവാ താഴ്‌ന്ന പ്രദേശം വായ് മൊഴിയിലൂടെ ആദൂരായി മാറുകയായിരുന്നുവെന്നും പറയെപ്പടുന്നു.


മായിപ്പാടി രാജാക്കന്മാരുടെ അധീനത്തിലായിരുന്നു ആദ്യ കാലത്ത്‌ ഈ രണ്ട് പ്രദേശങ്ങളും. ബല്ലാക്കന്മാര്‍ക്കായിരുന്നു അന്ന്‌ ഈ പ്രദേശങ്ങളുടെ ഉടമസ്ഥാവകാശം. പിന്നീട്‌ കരിച്ചേരി, നാരന്തട്ട
തുടങ്ങിയ നായര്‍ കുടുംങ്ങള്‍ കാടകം ഗ്രാമത്തില്‍ വന്നുചേര്‍ന്നു. കാലക്രമേണ ഭൂമിയുടെ ഭൂരിഭാഗവും അവരുടെ കൈവശമാവുകയായിരുന്നു.

ബ്രിട്ടീഷ്‌ ഭരണകാലത്ത്‌ പൊലീസ്‌സ്റ്റേഷന്‍, ഫോറസ്റ്റ്‌ റേഞ്ച്‌ ഓഫീസ്‌, ഗാര്‍ഡ്‌ ഓഫീസ്‌ ബെഞ്ച്‌ തുടങ്ങിയ
ഭരണ സ്ഥാപനങ്ങള്‍ ആദൂരില്‍ പ്രവര്‍ത്തനമാരംഭിച്ചു. അതോടെ ആദൂരിന്‌ ഭരണ സിരാകേന്ദ്രമെന്ന പദവിയും
ലഭിച്ചു. ഇത്‌ ആദൂരിന്റെ കുതിപ്പിന്‌ വഴിയൊരുക്കുകയായിരുന്നു. നാട്ടിലെ പ്രശ്‌നങ്ങള്‍ക്ക്‌ തീര്‍പ്പ്‌ കല്‍പ്പിക്കാനും പരിഹാരം കാണാനുമായി പ്രത്യേക കോടതിയും ഇവിടെ പ്രവര്‍ത്തിച്ചിരുന്നതായി പറയുന്നു.

ഇരുപതാം നൂറ്റാണ്ടി ന്‍റെ ആദ്യ ദശകത്തില്‍ തന്നെ ആദൂരില്‍ വിദ്യാഭ്യാസ സ്ഥാപനം തുടങ്ങിയിരുന്നു. ഭരണ സിരാകേന്ദ്രങ്ങളുടെ സാന്നിധ്യമായിരുന്നു അതിനും കാരണമായത്‌.

1930ല്‍ കെ. കേളപ്പന്റെ നേതൃത്വത്തില്‍ നടന്ന ഉപ്പ്‌ സത്യാഗ്രഹത്തിനും തുടര്‍ന്നു നടന്ന വന സത്യഗ്രഹത്തിനും ഈ പ്രദേശങ്ങള്‍ ചെയ്‌ത സംഭാവന എടുത്തു പറയേതാണ്‌. വനത്തില്‍നിന്ന്‌ തോലും വിറകും ശേഖരിക്ന്നക്കുതിന്‌ ജനങ്ങള്‍ക്ക്‌ അവകാശം നല്‍കണമെന്നാവശ്യപ്പെട്ടായിരുന്നു വനം സത്യഗ്രഹം. ഇരു സത്യഗ്രഹങ്ങള്‍ക്കുമായി ഈനാട്ടിലെ മുന്‍കാല നായകര്‍ ചെയ്‌ത ത്യാഗം നിസ്‌തുലമാണ്‌.

1940ല്‍ കാടകം കോരിക്കത്തുവെച്ച്‌ നടന്ന കര്‍ഷക സമ്മേളനം ഈ ഗ്രാമങ്ങളിലെ കര്‍ഷക പ്രസ്ഥാനത്തിന്റെ
വളര്‍ച്ചയെ സൂചിപ്പിക്കുന്നു. തുടര്‍ന്ന് ഇങ്ങോട്ടുണ്ടായ കാര്‍ഷിക മുന്നേറ്റത്തിന്‌ നാന്നി കുറിച്ചത്‌ ഈ സമ്മേ
ളനമായിരുന്നുവത്രെ. ഇവിടെ ജാതി വ്യവസ്ഥ നില നില്‍ക്കുകയും അയിത്തം ആചരിക്കപ്പെടുകയും കീഴ്‌ ജാതിക്കാരെ അകറ്റിനിര്‍ത്തുകയും ചെയ്‌തിരുന്ന ഒരു കാലമുണ്ടായിരുന്നു. ക്ഷേത്രത്തില്‍ പ്രവേശിക്കുന്നതിനും ക്ഷേത്രക്കുളത്തില്‍ കുളിക്കുന്നതിനും കീഴ്‌ ജാതിക്കാര്‍ക്ക്‌ വിലക്കേര്‍പ്പെടുത്തിയിരുന്ന ഗ്രാമങ്ങളിലൊന്നായിരുന്നു ഇത് . അന്ന്‌ ഹോട്ടലുകളില്‍ നിന്ന് നിന്നുപോലും അവര്‍ക്ക്‌ ചായ നല്‍കിയിരുന്നത്‌ ചിരട്ടയിലയിരുന്നെത്രെ.പില്‍ക്കാലത്ത്‌ സ്വാമി ആനന്ദതീര്‍ത്ഥയുടെ പ്രവര്‍ത്തനവും നിയമ സംവിധാനങ്ങളുടെ മാറ്റവും ഈ ഗ്രാമത്തെ സാമൂഹ്യ നവോത്ഥാനത്തിലേക്ക്‌  നയിക്കുകയായിരുന്നു.

`എഴുത്തൂട്ട്‌' എന്ന്‌ വിളിച്ചിരുന്ന കുടിപ്പള്ളിക്കൂടങ്ങളായിരുന്നു ഈ പ്രദേശങ്ങള്‍ക്ക്‌ ആദ്യാക്ഷരം കുറിച്ചുനല്‍കിയത്‌. പിന്നീട്‌ ആദൂരില്‍ സ്‌കൂള്‍ തുങ്ങിയതോടെ അതായി വിദ്യാഭ്യാസരംഗത്ത്‌ ആശ്രയം. 1927ല്‍ കാടകം വടക്കേകരയില്‍ തുടങ്ങിയ ഗവ: എല്‍.പി. സ്‌കൂളായി പിന്നീട്‌ പ്രധാന കേന്ദ്രം. കന്നട ഭാഷയിലായിരുന്നു ഇവിടെ ക്ലാസുകള്‍.
കാറഡുക്ക വൊക്കേഷണല്‍ ഹ യ ര്‍ െസ ക്ക റി സ്‌കൂളാണ്‌ ഇപ്പോഴത്തെ പ്രധാന വിദ്യാഭ്യാസ സ്ഥാപനം.

കാറഡുക്കയിലെ ഏറ്റവും ഉയര്‍ന്ന ഭാഗം മയിലാന്‍ കോട്ടയാണ്‌. നായക്കിന്റെ വംശ പരമ്പരയില്‍പെട്ടവര്‍ സ്ഥാപിച്ച കോട്ടയായാണ്‌ ഇത്‌ അറിയെപ്പടുന്നത്‌. അതിന്റെ അവശിഷ്‌ടങ്ങള്‍ കിടക്കുന്ന സ്ഥലം ഇപ്പോള്‍ കാഷ്യുപ്ലാന്റേഷന്റെ കീഴിലാണ്‌.

വിവിധ മത-ഭാഷകള്‍കൊണ്ട് സമ്പന്നമാണ്‌ കാറഡുക്ക. മലയാളം, കന്നട, തുളു, കൊങ്ങിണി, മറാട്ടി
ഭാഷകളാണ്‌ പ്രധാനമായും ഇവിടെ. തുളുനാടിന്റെ പ്രധാന ഭാഗമായിരുന്നതിനാല്‍ ആ തനിമ ഇന്നും നിലനിര്‍ത്തുന്നു്‌.
പാരമ്പര്യ വൈദ്യന്മാരും വിഷചികിത്സാ വിദഗ്‌ധരും ഈ നാടിന്റെ ആദ്യകാലം തൊട്ടുള്ള പ്രത്യേകതയാണ്‌.
ഈ രംഗങ്ങളില്‍ പേരെടുത്തവര്‍ ഏറെയാണ്‌. സാംസ്‌കാരികരംഗത്ത്‌ നിറസാന്നിധ്യമായ സംഘടനകളും വായന ശാലകളും ഇവിടെ പ്രവര്‍ത്തിച്ചു വരുന്നുണ്ട്.

ആദൂര്‍, പള്ളങ്കോട്‌, മുള്ളേരിയ, കാറഡുക്ക തുടങ്ങിയവയാണ്‌ കാറഡുക്ക പഞ്ചായത്തിലെ പ്രധാന ഗ്രാമങ്ങള്‍.
 ദുര്‍ഗാ പരമേശ്വരി ക്ഷേത്രത്തിലെ ഉത്സവവും ആദൂരിലെ പുരാതനമായ പള്ളിയിലെ ജാറം ഉറൂസും
ഈ ഗ്രാമത്തിന്റെ ആഘോഷവേളകളാണ്‌. നാടന്‍ കലാരംഗത്തും പറയത്തക്ക പാരമ്പര്യമുണ്ട് ഈ ഗ്രമത്തിന്ന്.  
പള്ളിയറകളില്‍ നിന്നുള്ള തെയ്യങ്ങളുടെ പുറപ്പാടും കളിയാട്ട മഹോത്സവങ്ങളും പൂരക്കളിയുടെ ചുവടുകളും കാറഡുക്കയ്‌ക്ക്‌ ഗ്രാമീണതയുടെ അര്‍ത്ഥശുദ്ധി നല്‍കുന്നു.
(Published in utharadesam with Jabir Kunnil)

Tuesday, January 22, 2013

കാഴ്‌ചകള്‍ മത്സരിക്കുന്ന കീഴൂരും മേല്‍പറമ്പും

    2:46:00 AM   12 comments
ഉത്തരദേശത്തെ കാണാകാഴ്‌ചകള്‍-19

 പ്രകൃതി തീര്‍ത്ത മനോഹര കാഴ്‌ചകളും ചരിത്രം പറയാനൊരുങ്ങിനില്‍ക്കുന്ന സ്‌മാരകങ്ങളും അതിനോളം പോന്ന കോണ്‍ക്രീറ്റ്‌ കെട്ടിടങ്ങളാലും സമ്പന്നമായ ഗ്രാമ പ്രദേശങ്ങളാണ്‌ മേല്‍പറമ്പും കീഴൂരും. കാസര്‍കോട്‌ നഗരത്തില്‍ നിന്ന്‌ എട്ട്‌ കിലോമീറ്റര്‍ തെക്കായി ചെമനാട്‌ പഞ്ചായത്തിലാണ്‌ മേല്‍പറമ്പ്‌ ടൗണ്‍ ഇവിടത്തോട്‌ ചേര്‍ന്ന്‌ അല്‍പം ഉള്ളിലായാണ്‌ കീഴൂര്‍ സ്ഥിതി ചെയ്യുന്നത്‌. രാജാ വാഴ്ചയുടെ കാലം തൊട്ട്‌ ബ്രിട്ടീഷുകാരുടെ കീഴടക്കലും കഴിഞ്ഞ്  അവിടെ നിന്ന്‌ ജന്മി കുടുംബങ്ങളിലേക്കുള്ള അധികാര മാറ്റത്തിലൂടെ ഇന്നത്തെ രീതിയിലുള്ള ഭരണ മാറ്റങ്ങളുടെ ചരിത്രം ഈ പ്രദേശങ്ങള്‍ക്കും പറയാനു്‌ണ്ട്. അത്തരം ഭരണ സംവിധാനങ്ങളുടെ അവശേഷിപ്പുകള്‍ ഇന്നും ഇവിടങ്ങളില്‍ ബാക്കി കിടപ്പു്‌ണ്ട്. കളനാട്ട്‌ റെയില്‍വെസ്റ്റേഷന്ന് സമീപത്തായുള്ള കീഴൂര്‍ ശാസ്‌താ ക്ഷേത്രം അത്തരത്തിലുള്ള ഒരു ചരിത്ര സ്‌മാരകമാണ്.
 കോലത്തിരി രാജ വംശത്തിന്റെ പ്രബലമായ ഒരു സൈന്യ വിഭാഗത്തിന്റെ ആസ്ഥാനമായിരുന്നു ആദ്യകാലത്ത്‌ ഈ

ക്ഷേത്രം. "അഞ്ഞൂറ്‌ നായന്മാര്‍" എന്ന പേരിലായിരുന്നു ഈ സൈന്യ വിഭാഗം അറിയപ്പെട്ടിരുന്നത്‌. കോലത്തിരി രാജ്യത്തെ കീഴടക്കാനായി മുന്നേറുകയായിരുന്ന ഇക്കേരിയുടെ സൈന്യത്തെ ധീരമായി നിന്ന്‌ ചെറുത്ത്‌ തോല്‍പ്പിച്ചത്‌ ഈ സൈന്യ വിഭാഗമായിരുന്നുവത്രെ.
പിന്നീട്‌ ഹൈന്ദവരുടെ പ്രമുഖ ആരാധനാ കേന്ദ്രമായി ശ്രീധര്‍മ്മ ശാസ്‌താ ക്ഷേത്രം മാറുകയായിരുന്നു. ഉത്തര കേരളത്തിലെ ശബരിമല എന്ന പേരിലും  ഈ ക്ഷേത്രം അറിയപ്പെടുന്നു. ജില്ലയിലെത്തന്നെ പ്രധാന ക്ഷേത്രങ്ങളില്‍ ഒന്നാണിത്‌.

കീഴൂരിലെ ജുമാമസ്‌ജിദ്‌ പുരാതനമായ മുസ്ലിം ആരാധനാലയമാണ്‌. ഈ മസ്‌ജിദിന്‌ കീഴില്‍ പ്രവര്‍ത്തിച്ചിരുന്ന പള്ളി ദര്‍സ്‌ ജില്ലയിലെ ആദ്യകാല മതപഠന കേന്ദ്രങ്ങളില്‍ ഒന്നായിരുന്നു. ഈയടുത്ത കാലത്താണ്‌ ദര്‍സ്‌ നിര്‍ത്തിവെച്ചത്‌. ഇപ്പോഴിവിടെ മദ്രസയാണ്‌ പ്രവര്‍ത്തിച്ചുവരുന്നത്‌. 
കീഴൂരിനടുത്തുള്ള ഒ റ വ ങ്ക ര യ ലെ സ്രാമ്പിപ്പള്ളിയും ഏറെ പുരാതനമായ പള്ളിയാണ്‌. ഇവിടെ വെള്ളത്തിന്‌ നല്ല രീതിയില്‍ ഇറവയുള്ളതിനാല്‍ `ഉറവങ്കര'യാണ്‌ പിന്നീട്‌ `ഒറവങ്കര'യായതെന്ന്‌ പറയപ്പെടുന്നു.

കീഴൂര്‍ കടപ്പുറത്തിന്‍റെ  സൗന്ദര്യം തേടി ജില്ലയുടെ വിവിധ ഭാഗങ്ങളില്‍ നിന്ന്‌ ദിനേന ഏറെ പേരെത്തുന്നു്‌.
നാലില്ലക്കാര്‍ വിഭാഗത്തില്‍പെട്ട മുക്കുവ വര്‍ഗമാണ്‌ ഇവിടെ കൂടുതലും താമസിക്കുന്നത്‌.
പൊന്നില്ലം, ചെമ്പില്ലം, കച്ചില്ലം, കാരില്ലം എന്നീ വിഭാഗങ്ങളായാണ്‌ ഇവര്‍ അറിയപ്പെടുന്നത്‌. മത്സ്യ ബന്ധനം മുഖ്യ
തൊഴിലാക്കിയവരാണ്‌ അവരില്‍കൂടുതലും. മറ്റുമതത്തില്‍പെട്ടവരും ഈ ഭാഗത്ത്‌ താമസിച്ചുവരുന്നു്‌.
കീഴൂര്‍ കടപ്പുറത്തെ ശ്രീ കുറുംബാ ഭഗവതി ക്ഷേത്രം ഈ പ്രദേശെത്തെ മറ്റൊരു  പ്രധാന ഹൈന്ദവ ആരാധനാലയമാണ്‌. ഒരുചെറിയ മുസ്ലിം പള്ളയും ഇവിടെയുണ്ട്. 


കീഴൂര്‍ ഹാര്‍ബറിന്റെ നിര്‍മ്മാണ പ്രവര്‍ത്തി പുരോഗമിച്ചുവരികയാണ്‌. കീഴൂര്‍ ബീച്ചിനടുത്തായുള്ള ചെമ്പരിക്ക ബീച്ചിലും ഏറെപേര്‍ ദിനേന സൗന്ദര്യാസ്വാദനം തേടിയെത്തുന്നു്‌. ഇവിടത്തെ പാറക്കൂട്ടങ്ങളും കടുക്കകല്ലുകളില്‍ നിന്നുമുള്ള   കടല്‍ സൗന്ദര്യം ആസ്വദിക്കാനാണ്‌ പലരുമെത്തുന്നത്‌.   ഇതിനടുത്തായി 'നരിമാളം' എന്ന പേരിലുള്ള ഗുഹ ഉണ്ടായിയിരുന്നതായി പറയപ്പെടുന്നു. ഒരു കാലത്ത്‌ നരികള്‍ ഇവിടെ കൂട്ടത്തോടെ താമസമാക്കിയിയിരുന്നുവത്രെ.  ഇപ്പോള്‍ നരിമാളത്തിന്റെ ചില ഭാഗങ്ങള്‍ മാത്രം അവിടെ അവശേഷിക്കുന്നു.

പഴയ പ്രതാപം വിളിച്ചോതുന്ന കുറേ കെട്ടിടങ്ങളിലും, പുതിയ കാഴ്ചകളായി കോണ്‍ക്രീറ്റ്‌ കെട്ടിടങ്ങളിലുമായി നിരവധി സ്ഥാപനങ്ങള്‍ സ്ഥിതി ചെയ്യുന്ന മേല്‍പറമ്പ്‌ ടൗണിന്‌ തിലകച്ചാര്‍ത്തായി തലയുയര്‍ത്തി നില്‍ക്കുകയാണ്‌ മേല്‍പറമ്പ്‌ ടൗണ്‍ ജുമാമസ്‌ജിദ്‌. ആധുനിക സജ്ജീകരണങ്ങളോടെ ഈയടുത്ത്‌ പുതുക്കിപ്പണിത ഈ പള്ളി മേല്‍പറമ്പ്‌ ടൗണിന്‌ പ്രത്യേകം സൗന്ദര്യം നല്‍കുന്നു. കൂറ്റന്‍ മിനാരങ്ങളും നിര്‍മ്മാണഭംഗിയും കാരണം മനോഹരമായ ഈ പള്ളി ഉത്തര മലബാറിലെത്തന്നെ ഏറ്റവും വലിയ മുസ്ലിം പള്ളിയായി പറയപ്പെടുന്നു. 

അതിവേഗം വളരുന്ന ടൌണ്‍  എന്നനിലയിലും മേല്‍പറമ്പ്‌ ശ്രദ്ധേയമാകുന്നു. ഉയര്‍ന്ന സ്ഥലം എന്ന അര്‍ത്ഥത്തിലാണ്‌ മേല്‍പറമ്പ്‌ എന്ന പേര്‌ വന്നതത്രെ.
 മേല്‍പറമ്പിനടുത്തുള്ള കൈനോത്ത്‌ എന്ന സ്ഥലത്തുള്ള റെയില്‍വെ തുരങ്കവും നൂറ്റാിന്റെ കഥ പറയുന്നു. 1905ല്‍ നിര്‍മ്മിച്ച ഈ തുരങ്കം ഇന്നും കോട്ടം തട്ടാതെ നിലനില്‍ക്കുന്നു. ഇതുവഴി പകല്‍ തീവണ്ടി യാത്ര നടത്തിയ ആര്‍ക്കും ഈ തുരങ്കത്തിലൂടെ തീവണ്ടി കടന്നു പോകുമ്പോള്‍ ഉണട്കുന്ന ഇരുട്ട്‌ ഒരു ഭീതിതമായ ഓര്‍മ്മയായിരിക്കും.

കാല്‍പ്പന്തുകളിക്ക്‌ നിസ്‌തുലമായ സംഭാവന നല്‍കിയ പ്രദേശങ്ങള്‍ കൂടിയാണ്‌ കീഴൂരും മേല്‍പറമ്പും. ജില്ലയിലെത്തന്നെ  ഏറ്റവും വലിയ സെവന്‍സ്‌ ഫുട്‌ബോള്‍ ടൂര്‍ണമെന്റുകള്‍ക്കും ഇവിടംപലതവണ വേദിയൊരുക്കിയിട്ടു്‌ണ്ട്.  സെവന്‍സ്‌ ഫുട്‌ബോള്‍ മത്സരങ്ങളില്‍ കണികകളുടെ ആവേശമായിമാറുന്ന ഒട്ടേറെ ക്ലബ്ബുകളും താരങ്ങളും ഈ പ്രദേശങ്ങളിലുണ്ട്. 

കാരുണ്യ-സേവന രംഗങ്ങളില്‍ ശ്രദ്ധേയമായ പ്രവര്‍ത്തനങ്ങള്‍ കാഴ്‌ചവെക്കുന്ന സന്നദ്ധ സംഘടനകളും ഈ പ്രദേശങ്ങളുടെ  പ്രത്യേകതയാണ്‌.

ചന്ദ്രഗിരി ഗവ: ഹയര്‍സെക്കണ്ടറി സ്‌കൂളാണ്‌ ഈ ഭാഗത്തെ പ്രധാന വിദ്യാഭ്യാസ സ്ഥാപനം. കീഴൂര്‍ ഗവ: ഫിഷറീസ്‌ സ്‌കൂള്‍, ഒറവങ്കര മഠത്തില്‍ ഗവ: എല്‍.പി. സ്‌കൂള്‍, ചെമ്പരിക്ക ഗവ: യു.പി. സ്‌കൂള്‍, ലുലു ഇംഗ്ലീഷ്‌ മീഡിയം ഹയര്‍സെക്കണ്ടറി സ്‌കൂള്‍ എന്നിവയാണ്‌ ഈ മേഖലയിലെ മറ്റു വിദ്യാഭ്യാസ സ്ഥാപനങ്ങള്‍.

കളനാട്‌ വില്ലേജ്‌ ഓഫീസ്‌, പഞ്ചായത്ത്‌ പ്രാഥമികാരോഗ്യ കേന്ദ്രം  എന്നിവ മേല്‍പറമ്പിലും ഗവ: ആയുര്‍വ്വേദ ചികിത്സാ കേന്ദ്രം  കീഴൂരിലും പ്രവര്‍ത്തിച്ചുവരുന്നു.
ചന്ദ്രഗിരി കോട്ടയുടെ സാന്നിധ്യവും മാണി പുഴ എന്ന നൂമ്പില്‍ പുഴയുടെ ഒഴുക്കും ഈ പ്രദേശങ്ങള്‍ക്ക്‌
പ്രത്യേക സൗന്ദര്യമൊരുക്കുന്നു.

(Published in Utharadesam with Jabir kunnil)




Thursday, November 8, 2012

സൗഹാര്‍ദ്ദത്തിന്റെ പാലങ്ങളൊരുക്കി കുമ്പഡാജെ

    1:31:00 AM   2 comments

ഉത്തരദേശത്തെ കാണാകാഴ്‌ചകള്‍-18
മായിപ്പാടി രാജവംശത്തിന്റെ കീഴിലായിരുന്ന പഴയ കുമ്പള സീമയുടെ പ്രധാനഭാഗമായിരുന്നു ആദ്യകാലത്ത്‌ കുമ്പഡാജെ. കദമ്പ വംശത്തില്‍പെട്ട ബീഡിന ബള്ളാളയായിരുന്നു കുമ്പഡാജെയുടെ ഭരണാധികാരി. സ്ഥലം സംബന്ധമായ പ്രശ്‌നങ്ങള്‍ പരിഹരിക്കാനായി `ചാവാടി' എന്ന പേരില്‍ സത്യം ചെയ്യിക്കല്‍ ചടങ്ങ്‌ അക്കാലത്ത്‌ ഇവിടെ നിലനിന്നിരുന്നുവത്രെ. വില്ലേജ്‌ ഓഫീസ്‌, മജിസ്‌ട്രേറ്റ്‌, വിദ്യാഭ്യാസ കേന്ദ്രം എന്നിവയൊക്കെ ഈ ഭരണത്തിന്റെ കീഴില്‍ ഇവിടെ പ്രവര്‍ത്തിച്ചിരുന്നതായി ചരിത്രം പറയുന്നു. ജ്യോതിഷ പണ്ഡിതര്‍, ഭാഗവതര്‍, ചിത്രകലാ വിദഗ്‌ധര്‍ എന്നിവര്‍ക്കൊക്കെ അര്‍ഹമായ പ്രാധാന്യം ഈ ഭരണകാലത്ത്‌ നല്‍കിയിരുന്നുവത്രെ. അന്ന്‌ മുതല്‍ കൃഷിയായിരുന്നു ഈ പ്രദേശത്തുകാരുടെ ജീവിതമാര്‍ഗം. 
പിന്നീട്‌ രണ്ട്‌ കുടുംബങ്ങളുടെ കീഴിലായിരുന്നു കുമ്പഡാജെയുടെ പ്രധാന ഭാഗങ്ങള്‍. ഒബ്രങ്കള കുനിക്കുല്ലായയുടെ പരമ്പരയില്‍പെട്ട ഒബ്രങ്കള കുടുംബവും കുമ്പഡാജെ ബീഡുവിന്റെ പരമ്പരയില്‍പെട്ട ബളക്കള കുടുംബവുമായിരുന്നു അവ. ഈ കുടുംബത്തില്‍ നിന്ന്‌ സ്ഥലം പാട്ടത്തിനെടുത്താണ്‌ നാട്ടുകാര്‍ കൃഷി ചെയ്‌തിരുന്നത്‌ എന്ന്‌ പറയപ്പെടുന്നു. ഏതാണ്ട്‌ എല്ലാ കാര്‍ഷിക വിളകളും ഇവിടെ കൃഷി ചെയ്‌തിരുന്നുവത്രെ. പിന്നീട്‌ ഇന്ദിരാഗാന്ധിയുടെ ഭരണകാലത്ത്‌ പ്രാബല്യത്തില്‍ വന്ന ഭൂപരിഷ്‌കരണ നിയമപ്രകാരം ഈ കുടുംബത്തിന്റെ അധീനതയിലായിരുന്ന സ്ഥലങ്ങള്‍ നഷ്‌ടപ്പെടുകയായിരുന്നു.

ആദ്യകാലത്ത്‌ ഒബ്രങ്കള എന്ന പേരിലായിരുന്നു പഞ്ചായത്തുണ്ടായിരുന്നത്‌. അത്‌ വിഭജിച്ച്‌ 1946 ഓടെ കുമ്പഡാജെ പഞ്ചായത്ത്‌ നിലവില്‍ വന്നു. 1960ല്‍ പഞ്ചായത്ത്‌ ആക്‌ട്‌ പ്രകാരം ഇരു പഞ്ചായത്തുകളും ചേര്‍ത്ത്‌ കുമ്പഡാജെ എന്ന പേരില്‍ ഏകീകരിക്കുകയായിരുന്നു. പഞ്ചരിക്കെ വിഷ്‌ണു ഭട്ടായിരുന്നു ആദ്യ പ്രസിഡണ്ട്‌.
1988ല്‍ വൈ.കെ. കേശവ ഭട്ട്‌ പ്രസിഡണ്ടായതോടെ ഈ നാടിന്റെ സുവര്‍ണ കാലഘട്ടം ഉടലെടുത്തതായി പറയുന്നു. അക്കാലത്ത്‌ എം.എല്‍.എയായ സി.ടി. അഹമ്മദലിയുടെ പ്രയത്‌നവും ഈ നാടിന്റെ വളര്‍ച്ചക്ക്‌ കാരണമായി. അതുവരെ യാത്രാക്ലേശവും മറ്റും കാരണം ഏറെ ദുരിതമനുഭവിച്ചിരുന്ന ഈ നാട്ടിലേക്ക്‌ ഇരുവരുടെയും ശ്രമഫലമായി റോഡുകളും പാലങ്ങളും വന്നത്‌ വികസനത്തിന്റെ പൂതിയ വഴികള്‍ തുറന്നുകൊടുത്തു. ഏറെ റോഡുകളും പാലങ്ങളും വന്നതോടെയാണ്‌ ഈ പ്രദേശം ഏറെ ശ്രദ്ധിക്കപ്പെട്ടത്‌. നാരമ്പാടി, കൂഡല്‍, കുമ്പഡാജെ എന്നീ പാലങ്ങളും കൊടവന വയല്‍, കൂടല്‍ തുടങ്ങിയടങ്ങളിലെ തൂക്കുപാലങ്ങളും ഈ പ്രദേശത്തുകാര്‍ക്ക്‌ എളുപ്പവഴിയൊരുക്കുന്നതിനൊപ്പം പ്രത്യേക സൗന്ദര്യംകൂടി നല്‍കുന്നു.
വിവിധ ജാതി-മത-ഭാഷകള്‍കൊണ്ട്‌ സമ്പന്നമാണ്‌ കുമ്പഡാജെ.
 കാസര്‍കോടിന്റെ മണ്ണില്‍ തീരാത്ത മുറിവേല്‍പ്പിച്ച്‌ പലഭാഗത്തുനിന്നും ഇടയ്‌ക്കിടെ വര്‍ഗീയ സംഘര്‍ഷങ്ങള്‍ ഭീതിപ്പെടുത്തുമ്പോള്‍ പണ്ട്‌ മുതല്‍ക്കെ തുടരുന്ന സൗഹാര്‍ദ്ദം കാത്തുസൂക്ഷിച്ച്‌ കുമ്പഡാജെ വേറിട്ടുനില്‍ക്കുന്നു. ഇതാണ്‌ ഈ ഗ്രാമത്തിന്റെ ഏറ്റവും നല്ല പ്രത്യേകത.
ബെളിഞ്ച, മാര്‍പ്പനടുക്ക, ചെറുമി, ഗോസാഡ, ഏത്തടുക്ക, മനൂര്‍, കുറുവത്തടുക്ക, അഗല്‍പാടി, മരിക്കാന, തുപ്പക്കല്‍ തുടങ്ങിയവയാണ്‌ കുമ്പഡാജെയിലെ പ്രധാന സ്ഥലങ്ങള്‍.
വിദ്യാഭ്യാസ രംഗത്ത്‌ ഏറെ പിന്നോക്കം നില്‍ക്കുന്ന ഗ്രാമങ്ങളില്‍ ഒന്നാണ്‌ കുമ്പഡാജെ. ഏറെ പ്രദേശങ്ങളുണ്ടായിട്ടും ഹൈസ്‌കൂള്‍ സൗകര്യമില്ലാത്ത ചുരുക്കം പഞ്ചായത്തുകളില്‍ ഒന്നാണിത്‌. ഇതുതന്നെയാണ്‌ ഈ പ്രദേശത്തിന്റെ പിന്നോക്കാവസ്ഥക്ക്‌ കാരണം. ആകെയുള്ളത്‌ കുമ്പഡാജെ ജി.ജെ.ബി.എസ്‌, മരിക്കാന എല്‍.പി. സ്‌കൂളുകളും, ബെളിഞ്ച യു.പി. സ്‌കൂളും മാത്രമാണ്‌. തുടര്‍പഠനത്തിന്‌ മറ്റു ഗ്രാമങ്ങളെ ആശ്രയിക്കേണ്ട സ്ഥിതിയാണുള്ളത്‌.
വടക്കന്‍ ശബരിമല എന്നറിയപ്പോടുന്ന ഒബ്രങ്കള ശ്രീ ശാസ്‌താ ദേവസ്ഥാനമാണ്‌ ഈ പ്രദേശത്തെ പ്രമുഖ ഹൈന്ദവ ആരാധനാലയം. ശബരിമല പോലെ 18 പടി ചവിട്ടിവേണം ഇവിടേയുമെത്താന്‌. ബെളിഞ്ച, അഗല്‍പാടി, കൊടുപ്പള ക്ഷേത്രങ്ങളും പ്രസിദ്ധമാണ്‌.
ബെളിഞ്ച, അന്നടുക്ക, ഒബ്രങ്രള എന്നിവിടങ്ങളിലെ മുസ്ലിം പള്‌ലികള്‍ ഏറെ പുരാതനമാണ്‌. കുമ്പഡാജെ ഖിളര്‍ ജുമാമസ്‌ജിദാണ്‌ മറ്റൊരു പ്രധാന മുസ്ലിം പള്ളി. ഈ ജമാഅത്തിന്‌ കീഴിലുള്ള മഖാമില്‍ നടത്തിവരാറുള്ള ഉറൂസ്‌ നേര്‍ച്ച ഏറെ പ്രശസ്‌തമാണ്‌.
പണ്ടുകാലത്ത്‌ കോഴിക്കെട്ട്‌ എന്ന വിനോദം ഏറ്റവും കൂടുതല്‍ നടന്നിരുന്ന പ്രദേശമാണിത്‌. നിരവധി പ്രമുഖ യക്ഷഗാന കലാകാരന്മാരും കുമ്പഡാജെയ്‌ക്ക്‌ മേല്‍വിലാസം നല്‍കിയവരില്‍പെടുന്നു. മുന്‍ എം.പി. എം. രാമണ്ണ റൈ ഈ നാടിന്റെ ഏറ്റവും വലിയ സംഭാവനയാണ്‌.
കാസര്‍കോട്ടുനിന്ന്‌ 28 കിലോമീറ്റര്‍ കിഴക്കാണ്‌ കുമ്പഡാജെ സ്ഥിതി ചെയ്യുന്നത്‌. ബദിയഡുക്ക-അഡ്യടുക്ക, ചെങ്കള, നെക്രാജെ, ബെള്ളൂര്‍-പഡ്രെ, മുള്ളേരിയ-നാരമ്പാടി വഴി കുമ്പഡാജെയിലെത്തും.
(published in utharadesham with jabir kunnil)

Wednesday, November 7, 2012

എണ്‍മകജെ -എന്‍ഡോസള്‍ഫാന്‍ ദുരന്തം വിതച്ച വഴികളിലൂടെ

    12:23:00 AM   6 comments
ഉത്തരദേശത്തെ കാണാകാഴ്‌ചകള്‍-17
എന്‍ഡോസള്‍ഫാന്‍ എന്ന മാരക കീടനാശിനി ഏറ്റവും കൂടുതല്‍ ദുരിതം വിതച്ചതും ഏറ്റവും ആദ്യം ഈ കീടനാശിനി ദുരന്തത്തിന്റെ അലയൊലികള്‍ റിപ്പോര്‍ട്ട്‌ ചെയ്യപ്പെടുകയും ചെയ്‌ത പ്രദേശമാണ്‌ എണ്‍മകജെ.
കേരളത്തിന്റെ ഏറ്റവും വടക്കുകിഴക്കായി സ്ഥിതി ചെയ്യുന്ന മലയോര ഗ്രാമം. പ്രകൃതി കനിഞ്ഞരുളി സൗന്ദര്യം നല്‍കിയ ഭൂപ്രദേശങ്ങള്‍. എന്‍ഡോസള്‍ഫാന്‍ പ്രയോഗത്തില്‍ മണ്ണിനും ജലത്തിനും മായം ചേര്‍ക്കപ്പെട്ടെങ്കിലും എങ്ങും പച്ചപ്പ്‌ നിറഞ്ഞ കാഴ്‌ചകളോടെയാണ്‌ എണ്‍മകജെ കാഴ്‌ചക്കാരെ സ്വാഗതം ചെയ്യുന്നത്‌.
എണ്‍മകജെ കഴിഞ്ഞ കുറെ വര്‍ഷമായി ദേശീയ-അന്തര്‍ദേശീയ മാധ്യമങ്ങളുടെ റിപ്പോര്‍ട്ടുകളില്‍ സ്ഥിരമായി ഇടംപിടിച്ചു. 1975 മുതല്‍ തളിച്ചു തുടങ്ങിയ എന്‍ഡോസള്‍ഫാന്‍ എന്ന കീടനാശിനി ദുരന്തത്തിന്റെ പര്യായമായി എണ്‍മകജെ അറിയപ്പെട്ടു. പ്രശസ്‌ത എഴുത്തുകാരന്‍ അംബികസുതന്‍ മാങ്ങാട്‌ എന്‍ഡോസള്‍ഫാന്‍ ദുരിതം പ്രമേയമാക്കി രചിച്ച നോവലിന്‌ നല്‍കിയ പേരും `എണ്‍മകജെ' എന്ന്‌ തന്നെയായിരുന്നു. അതും ഈ നാടിനെ പ്രശസ്‌തമാക്കിത്തീര്‍ത്തു.
കീടനാശിനി പ്രയോഗത്തിന്റെ വലിയ രക്തസാക്ഷിത്വ ഭൂമികളായ പെഡ്രെ, സ്വര്‍ഗ തുടങ്ങിയ പ്രദേശങ്ങള്‍ എണ്‍മകജെയിലാണ്‌.

പെഡ്രെ സ്വദേശിയായ ശ്രീപെഡ്രെ എന്ന കര്‍ഷകനും പത്രപ്രവര്‍ത്തകനും കൂടിയായ സാമൂഹ്യ പ്രവര്‍ത്തകനാണ്‌ ഈ ദുരന്തത്തെക്കുറിച്ച്‌ ആദ്യം പുറംലോകത്തെ അറിയിച്ചത്‌.
പെര്‍ളയാണ്‌ എണ്‍മകജെയുടെ തലസ്ഥാനം. ചെറിയ ടൗണ്‍. വ്യത്യസ്‌തരായ ജനവിഭാഗങ്ങള്‍ താമസിക്കുന്ന പ്രദേശം. കന്നട, മലയാളം, തുളു, മറാഠി, ബ്യാരി ഭാഷകള്‍ വ്യാപകമായി ഉപയോഗിച്ചുവരുന്നു. 

പെര്‍ളയ്‌ക്കടുത്തുള്ള മണിയംപാറയും പെര്‍ളയില്‍ നിന്ന്‌ 5 കി.മീ. ദൂരമുള്ള അട്‌ക്കസ്ഥലയും ടൂറിസ്റ്റുകളെ ആകര്‍ഷിക്കുന്ന മനോഹര പ്രദേശങ്ങളാണ്‌. 
പെര്‍ള ടൗണില്‍ ബുധനാഴ്‌ച തോറും നടക്കുന്ന ആഴ്‌ചച്ചന്ത പ്രാദേശിക വിപണനത്തിന്റെ വലിയ സാധ്യതകള്‍ തുറക്കുന്നു. അതോടൊപ്പം കര്‍ഷകര്‍ക്ക്‌ മികച്ച അവസരങ്ങളും നല്‍കുന്നു. ഷിറിയ, അട്‌ക്കസ്ഥല തുടങ്ങിയ പുഴകള്‍ പെര്‍ളയുടെ പരിസരത്തായി ഒഴുകുന്നു. സര്‍പ്പമല, മണിയംപാറ തുടങ്ങിയ ഉയര്‍ന്ന പ്രദേശങ്ങള്‍ ഈ നാടിന്‌ ആഢ്യത്വം നല്‍കുന്നു.
പെര്‍ള, പെഡ്രെ, സ്വര്‍ഗ തുടങ്ങിയ പ്രദേശങ്ങള്‍ അടങ്ങുന്ന എണ്‍മകജെ പഞ്ചായത്ത്‌ 1952ലാണ്‌ രൂപം കൊണ്ടത്‌. വടക്കും കിഴക്കും കര്‍ണാടകയുമായി അതിര്‌ പങ്കിടുന്ന ഈ പഞ്ചായത്തില്‍ പ്രധാനമായും കവുങ്ങ്‌, തെങ്ങ്‌, നെല്ല്‌, കുരുമുളക്‌, വാഴ തുടങ്ങിയവ കൃഷി ചെയ്യുന്ന കര്‍ഷകരാണ്‌ അധിവസിക്കുന്നത്‌. 

കവുങ്ങ്‌ കൃഷിയും എണ്‍മകജെയിലെ പ്രധാന കൃഷിയാണ്‌. അതില്‍ ബജകുടില്‍കാവ്‌ വളരെയധികം ചരിത്രപ്രാധാന്യമുള്ളതാണ്‌. ബജകൂടിലെ ഗോജന്യ ആയുല്‍വ്വേദ മരുന്ന്‌ ഉല്‍പാദക കേന്ദ്രം, മരുന്നുല്‍പാദനത്തിനും ഗോ സംരക്ഷണത്തിനും പ്രശസ്‌തമാണ്‌. കേരളത്തില്‍ വംശനാശം സംഭവിച്ചുകൊണ്ടിരിക്കുന്ന കാസര്‍കോട്‌ ഇനം പശുക്കളെ വളര്‍ത്തുന്ന കേന്ദ്രമാണിത്‌. അതുപോലെ രാജസ്ഥാന്‍ ഇനങ്ങളും ഇവിടെ വളര്‍ത്തുന്നുണ്ട്‌. 

എല്ലാ വര്‍ഷവും നടത്തുന്ന എണ്‍മകജെ നേമോത്സവം പ്രശസ്‌തമാണ്‌. പിലിച്ചാമുണ്ഡി, രക്തേശ്വരി പരിവാര ദൈവങ്ങളുടെ പേരില്‍ അഞ്ചുദിവസങ്ങളിലായാണ്‌ ഉത്സവം നടക്കുന്നത്‌. ഭൂതക്കോലങ്ങളുമായി ബന്ധപ്പെട്ടാണ്‌ ഈ ഉത്സവം നടക്കുന്നത്‌. ബല്ലാ രാജാക്കന്മാരുടെ കാലം തൊട്ടേ നടന്നുവരുന്നു. ഏതാണ്ട്‌ 470 വര്‍ഷത്തെ പഴക്കമുണ്ട്‌ എണ്‍മകജെ നേമോത്സവത്തിന്‌. എണ്‍മകജെ തറവാടിന്റെ ഉത്സവമായാണ്‌ ഇത്‌ നടക്കുന്നത്‌. എണ്‍മകജെ തറവാട്‌ പുരാതനമായ തറവാടും ശേഷിപ്പുകളും അടങ്ങിയതാണ്‌. 1994ല്‍ നടന്ന തീപിടിത്തത്തില്‍ ക്ഷേത്രവും മറ്റും കത്തിനശിച്ചെങ്കിലും പിന്നീട്‌ പുനരുദ്ധാരണം നടത്തി. തറവാടിന്റെ പ്രധാന വ്യക്തി `യജമാനെ'യാണ്‌. ഇപ്പോഴത്തെ `യജമാനെ' വിശ്വനാഥ റായിയാണ്‌.
സാംസ്‌കാരിക രംഗത്തും എണ്‍മകജെയുടെ സാന്നിധ്യം കാണാന്‍ കഴിയും. യക്ഷഗാന രംഗത്തെ പ്രശസ്‌ത കലാകാരന്‍ കൃഷ്‌ണ ഭട്ട്‌ എണ്‍മകജെ, പെര്‍ള സ്വദേശിയാണ്‌. പഡ്രെ ചന്തു സ്‌മാരക നാട്യനിലയം കലാ-സാംസ്‌കാരിക രംഗത്ത്‌ പ്രവര്‍ത്തിക്കുന്നു. അതുപോലെ തന്നെ പെര്‍ളയിലെ നളന്ദ ആര്‍ട്‌സ്‌ ആന്റ്‌ സയന്‍സ്‌ കോളേജ്‌ ജില്ലയിലെത്തന്നെ പ്രമുഖ കോളേജുകളില്‍ ഒന്നാണ്‌. കാട്ടുകുക്കെ ക്ഷേത്രത്തിലെ ഷഷ്‌ടി ഉത്സവം, ബജകൂഡ്‌ലു ക്ഷേത്രോത്സവം തുടങ്ങിയവ ഈ നാടിന്റെ പ്രധാന ഉത്സവങ്ങളാണ്‌.
അതുപോലെ വിവിധ പള്ളികളിലെ ഉറൂസുകളും ക്രിസ്‌ത്യന്‍ പള്ളികളിലെ പെരുന്നാളുകളും ഇവിടുത്തെ പ്രധാനപ്പെട്ട ആഘോഷങ്ങളാണ്‌. പെര്‍ള, മണിയംപാറ, മൈര, ഉക്കിനടുക്കം എന്നിവിടങ്ങളിലെ മുസ്ലിം പള്ളികളും സുബ്രായ ക്ഷേത്രം, ദുര്‍ഗാ പരമേശ്വരി ക്ഷേത്രം, മഹാലിംഗേശ്വര ക്ഷേത്രം, ധൂമാവതി ക്ഷേത്രം തുടങ്ങിയ ക്ഷേത്രങ്ങളും മണിയംപാറ, ഉക്കിനടുക്കം തുടങ്ങിയ ഇടങ്ങളിലെ ക്രിസ്‌ത്യന്‍ പള്ളികളും ഈ പ്രദേശത്തെ പ്രധാന ആരാധനാലയങ്ങളാണ്‌.
(published in utharadesham with jabir kunnil)



Get updates in your email box

Complete the form below, and we'll send you our recent update.

Deliver via FeedBurner